Bålet skal helst ikkje brenna med open flamme, berre gløda og ulma. Oreveden er ein framifrå kulturberar. Vi kjøper den frå bønder i lokalmiljøet, dei har dette som ein tilleggsaktivitet no som før.

Etter ei viss røyketid skal pølsene kvila, så skal dei igjen røykast, for deretter å kvila. Slik går det føre seg i fleire veker, og intervalla endrast etter kvart som prosessen skrid fram og tilhøva ligg til rette. Ingen røyking er lik.

I sluttfasen er handverkaren einerådande, sansane og erfaringane avgjer: Kneppa med hendene, sjå og vurdera, fargen, tjukkleik, men også det uidentifiserte, her må det også følast kva som er riktig.